6 حاجات لازم تبقى عارفها قبل الانترفيــو الجاي



أنك تلاقى وظيفة مناسبة موضوع مش سهل ،والى بيزود صعوبته هي أنك بتروح مقابلات كتيرة قبلها . بالممارسة  الموضوع بيكون أسهل ومعتاد  لكن كمان كل شركة بيكون ليها أسلوب في أسئلة ” الانترفيو ” مختلفة عن بعض ، وده الى بيخلينا مش عارفين ازاى نحضر للمقابلة .

دى نصايح عامة على لسان الأشخاص الى بيعملوا المقابلة لازم تعرفها هتساعدك أنك تستعد بشكل أفضل للمقابلة :

  • مش بنفضل فاكرين اللحظات المحرجة الى مريت بيها على المدى البعيد :

لأننا مش بنقابل شخص واحد بس ، كمان مش بناقش مقابلة واحدة بس في ال8 ساعات الى بنكون فيها في الشغل ، كمان بيكون عندنا مهام تانية زى الإعلان عن الوظايف والتقارير والتحضير للاجتماعات ، لأن الموضوع مش شخصى أبدا فبلاش يكون عندك هاجس أننا بنراقب التفاصيل الصغيرة في لغة الجسد الخاصة بيك لأن غالبا أي موقف محرج مريت بيه مش بنفتكره على المدى البعيد .

 

  • عايزينك تتعرف على موقعنا على الانترنت :

ياريت بلاش تروح انترفيو وأنت مش مستعد ، لازم تكون عارف الشركة الى هتعمل فيها الانترفيو وتعرف ايه هي رؤيتهم وهدفهم ، كمان تتابع  التطورت والأحداث الجارية . ليه  عايز تبقى جزء من شركة متعرفش حاجة عنها ؟ لازم تجاوب نفسك على السؤال ده.

  • حضر أسئلة المقابلة المختلفة وإجاباتها :

أهم حاجة هو التحضير للمقابلة كويس . على الأقل حتى لو متقبلتش في الشغل ، تقدر تقول لنفسك أنك عملت أفضل حاجة عندك . وأفضل طريقة للتحضير هي أنك تكرر الإجابات في عقلك للأسئلة المعروفة الى دايما بتتسأل علشان تكون جاهز لو اتسألت أي سؤال منهم .


  • لازم تعرف واجبات ومسئوليات شغلك :

قبل ما تروح الانترفيو ، لازم تكون عارف – على قد ما تقدر – دورك في الوظيفة لو اتقبلت فيها . علشان كده اقرا ” الوصف الوظيفى ” المعلن عنه من الشركة  ، كمان لو في أي حاجة غامضة أو أنت مش فاهمها لازم تستفسر عنها في المقابلة ، لأن الوضوح في الانترفيو ممكن ينقذك من مشاكل كتير كانت هتحصل لو اتقبلت في الوظيفة .

  • تعرف دور الشركة وايه الى ممكن تضيفه ليها :

بلاش تروح أي مقابلة عمل وأنت مش عارف ازاى ممكن تكون رصيد يتضاف للشركة أو مش عارف أنت هتقدم ايه . لأن الثقة الزايدة في النفس  والوعود الكدابة  الى بتقدمها  للشركة بتجيب نتايج عكسية .

  • أحنا كمان بنكون على أعصابنا في المقابلة :

أحنا كمان بنكون عارفين أن في اختيارات تانية متاحة ليك  لأن طبيعى يكون في شركات منافسة أفضل أو معروفة أكتر أو بيئات عمل أحسن  وأجور أعلى  ، وعارفين أنك ممكن متقبلش عرضنا في حالة أنك اتقبلت . خليك عارف أن على قد ما أنت بتحاول ترضينا ، أحنا كمان بنحاول نكون على قد توقعاتك .

 



مواضيع ذات صلة
مقالات مفيده